ನೀನುಳಿಯದೆ ಹೋದದ್ದು
ನಾ ಮಿಕ್ಕದೆ ಅಳಿದದ್ದು
ಈ ಶೂನ್ಯದೊಳಗೆ
ಲೀನವಾದದೆಷ್ಟೋ ಕತೆಗಳಲಿ
ನಮ್ಮದೂ ಸೇರಿಹೋಗಲಿದೆ.
ಮತ್ತೆ ಎಲ್ಲವೂ ಬರೀ ಶೂನ್ಯವೆಂಬುದು
ಎಷ್ಟನೆಯದೋ ಬಾರಿ ದೃಢಗೊಳ್ಳಲಿದೆ.

ಅಷ್ಟರೊಳಗೊಮ್ಮೆ
ನಿರ್ವಾತದೊಳಗೂ ಉಸಿರಿನ ಪಲುಕು
ನಿರ್ವರ್ಣದೊಳಗೂ ಮಳೆಬಿಲ್ಲ ಥಳಕು
ನೋಟ ಹೆಣೆದ ಚಪ್ಪರ; ನಗೆಬಳ್ಳಿ ಬಳುಕು
ಕೂಟ ನೇಯ್ದ ಕನಸು; ಸವಿನೆನಕೆ ಮೆಲುಕು
ಪವಾಡಗಳ ಮೆತ್ತೆಯ ಮೇಲೊಮ್ಮೆ
ನಡೆದುಬಿಡುವಾ..

ಪ್ರೇಮವೂ ಜೀವಂತ ನಮ್ಮಂತೆಯೇ.
ಪ್ರೀತಿಯೊಂದು ಕಣ್ಣು, ಕಾಮನೆಯೊಂದು.
ಪಟ್ಟಿಯೊಂದಕೂ ಕಟ್ಟದೆ
ದಿಟ್ಟಿದೀವಿಗೆಯುರಿಸುವಾ
ಕತ್ತಲೂ ಹೊಳೆಹೊಳೆವಂತೆ.
ಎಚ್ಚರಾಗಿಸುವ ಸಮ್ಮಿಲನ
ನಿಚ್ಚ ಸಂಕಲ್ಪಿಸಿ ಪ್ರೇಮಿಸಿಬಿಡುವಾ.

ನಾಳೆಯ ಹೆಗಲಲಿ ಮೂಟೆಯಿದೆ.
ಥೇಟ್ ನಿನ್ನೆಗಿದ್ದಂತೆ,
ಇಂದು ಹೊತ್ತು ತಂದಂತೆ.
ಒಳಗಿಣುಕುವ ಧಾವಂತವೂ
ಕೂಡಿ ಕಳೆವ ಲೆಕ್ಕದಾಟವೂ
ಒತ್ತಟ್ಟಿಗಿಟ್ಟು ಕೈಯ್ಯಿತ್ತು ಇಳಿಸಿಕೊಳುವಾ
ಹಗುರಾದ ನಾಳೆಯನೂ ಬದುಕಿಸಿಬಿಡುವಾ..