ನಾ ನಾಳೆ ಬರುವಾಗ....


------------------

ನಾ ಬರುವೆನೆಂದು ಸಿಂಗರಿಸಿಕೊಳಬೇಕೇನೇ ನೀನು?

ಹೊಸದಾಗಿ ತೋರುವಂಥದ್ದುಳಿಸಿದಿಯೇನೇ ಇನ್ನೂ...



ಒದಗಿದೊಂದೇ ನೋಟವದು, ಶರಣಾಗಿಸಿತ್ತು...

ಅಲ್ಲ...

ಕಣ್ಣು ದೊಡ್ಡವೆಂದಲ್ಲ... ಎರಡು ಕನ್ನಡಿಗಳೆಂದು..

ಮೂಗು ಚೂಪೆಂದಲ್ಲ, ಒಳಿತಿಗಷ್ಟೆ ತೆರೆವದ್ದೆಂದು,

ಬಾಯಿ ಪುಟ್ಟದೆಂದಲ್ಲ...ಒಂದು ಸತ್ಯವೆಂದು,

ನಗು ಚಂದವೆಂದಲ್ಲ..ಒಂದು ಮಗುವೆಂದು,

ಹಣೆ ಚಿಕ್ಕದೆಂದಲ್ಲ, ಶುದ್ಧಭಾವಗಳ ಮನೆಯೆಂದು,

ಭಂಗಿ ಸುಂದರವೆಂದಲ್ಲ, ಬಲುದೃಢವೆಂದು...

ಮರುಳಾದದ್ದು ಕಣೇ..., ಹೀಗಿದ್ದೆಲ್ಲೂ ಕಂಡಿರಲಿಲ್ಲ....



ನೀ ಬಳುಕೊ ಬಳ್ಳಿಯೆಂದಲ್ಲ.. ಸುಮಕೋಮಲೆಯೆಂದಲ್ಲ,

ಬಣ್ಣ ಬಿಳಿಯೆಂದಲ್ಲ... ಅಷ್ಟೆಲ್ಲಾ ಯಾಕೆ...

ಅನುಪಮ ಸುಂದರಿಯೆಂದಲ್ಲ ಮೆಚ್ಚಿದ್ದು....

ನಾ ಕಂಡಷ್ಟು ನಿನ್ನ ಕಂಡವರುಂಟೇನೇ....?

ಬಿಡು...ದೇಹವನಲ್ಲ... ಮನವನಣಿಯಾಗಿಸು

ನಾ ಕಂಡಂತೆ ಕಾಣಲಿಕೆ, ಒಪ್ಪಿದಂತೊಪ್ಪಲಿಕೆ,

ಮಣಿದಂತೆ ಮಣಿಯಲಿಕೆ, ಲೀನವಾಗಲಿಕೆ,

ಮತ್ತಾ ಮನೋಮಿಲನದಲ್ಲಿ ನೀನಿಲ್ಲವಾಗಲಿಕೆ...