ನಿನಗಾಗದಿದ್ದರೆ....

-----------------------
ಇರಲಿಬಿಡು, ನೀ ಜಗಕೆಲ್ಲ ಚಂದಿರ,
ಹರಡಬೇಕು ಎಲ್ಲೆಡೆ ಚಂದ್ರಿಕೆಯ ಹಂದರ.
ಅಡ್ಡ ಬಂದೀತು ಮೋಡ, ಮರ, ಪುಟ್ಟ ಹಕ್ಕಿ,
ನೀ ಇಣುಕಲಾಗದಿರೆ, ಬಿಟ್ಟುಬಿಡು.
ನಾ ನಿರುಕಿಸುತಲೇ ಇರುವೆ.
ನನಗೊಂದೇ ಅಕಾಶ, ಅದಕೊಂದೇ ಶಶಾಂಕ.

ಇರಲಿಬಿಡು ನೀ ನೆಲೆಯಿರದ ತಂಗಾಳಿ,
ಬೀಸುತಿರಬೇಕು ನೀ ಲೋಕಸಂಚಾರಿ.
ಅಡ್ಡ ಬಂದೀತು, ಗೋಡೆ, ಬೆಟ್ಟ, ಗುಡ್ಡ,
ರಿಂಗಣಿಸಲಾಗದಿರೆ ಈ ಹೆಬ್ಬಾಗಿಲ ಗಾಳಿಗಂಟೆ, ಬಿಟ್ಟುಬಿಡು.
ನನ್ನ ಹೆಬ್ಬಾಗಿಲೇ ಹಿಂಬಾಲಿಸೀತು.
ಅದಕೊಂದೇ ದಾರಿ, ಉದ್ದಕೂ ನಿನದೇ ಮೋಡಿ.

ಇರಲಿಬಿಡು ಹೂವೇ, ನೀ ಉದ್ಯಾನವನದಾಸ್ತಿ,
ಸೆಳೆಯಬೇಕು ಊರಿನೆದೆಯ ಆಸಕ್ತಿ.
ನೀರು, ಮಣ್ಣು, ಸುತ್ತುಮುತ್ತೂ ತಪ್ಪಿದ್ದೀತು,
ನನ್ನ ತೋಟದಲರಳಲಾಗದಿರೆ ಬಿಟ್ಟುಬಿಡು.
ನನ್ನ ತೋಟವೇ ನಿನ್ನಡಿಗೆ ಬಂದೀತು..
ಅದಕೆ ನಿನದೇ ಭಕ್ತಿ, ಮತ್ತಷ್ಟೇ ವ್ಯಾಪ್ತಿ.

ಇರಲಿಬಿಡು ಪ್ರೇಮವೇ, ನೀ ವಿಶ್ವವ್ಯಾಪಿ,
ಏರುತಿರಬೇಕು ನೀನೆಂದೂ ಊರ್ಧ್ವಮುಖಿ.
ಅಡ್ಡ ಬಂದೀತು ಹಮ್ಮುಬಿಮ್ಮು, ಅಭಿಮಾನ,
ನನ್ನ ಗಮನಿಸಲಾಗದಿದ್ದರೆ, ಬಿಟ್ಟುಬಿಡು.
ನಾನೇ ಎಕ್ಕರಿಸುವೆ, ನಿನ್ನೆಡೆಗೇರುವೆ.
ನನಗೆ ನೀನೇ ಗುರಿ, ಬರುವೆ ಎಲ್ಲ ಮೀರಿ.