**

ಅಯ್ಯೋ ಬಿಡು!
ಪಟ್ಟುಹಿಡಿದು ನಾನೂ ಕೂತಿರಲಿಲ್ಲ,
ದುಪ್ಪಟ್ಟು ಕೊಟ್ಟು ಕೊಳುವರಿಲ್ಲದಿರಲಿಲ್ಲ.
ಮನಸು ಅದೇ ಸಂತೆಯ ಅದೇ ಸೂರಿನಡಿ
ಅದೇ ಸರಪಳಿಯೊಳಗೆ ಪಾದವೂರಿದ್ದು
ನಿನ್ನೆದೆಯಲಿದ್ದು ಬಂದದ್ದು, ಅದೇ ಬಂಡವಾಳದ
ಇನ್ಯಾರೂ ಖರೀದಿಸಲಾಗದ ಬೆಲೆ ಕೂಗಿದ್ದು
ನಿನ್ನ ಪಾಕೀಟು ತೆತ್ತು ಖಾಲಿಯಾದದ್ದು
ಹಾಗೆ ನಿನ್ನ ಕೈಯ್ಯೊಳಗೆ ಸರಕು ಹೊಕ್ಕದ್ದು
ಸರಕ ಹೊತ್ತು ಹೊರಟ ನಿನ್ನ ಸರಪಳಿ,
ಪಾದ, ಸೂರು ಇನ್ನೆಲ್ಲ...
ಕೊನೆಗೆ ಸಂತೆಗೆ ಸಂತೆಯೇ ಹಿಂಬಾಲಿಸಿದ್ದು
ಎದೆಯುಬ್ಬಿಸಿ ತಲೆಯೆತ್ತಿ ನೀ ಮುಂದೆ ಮುಂದೆ
ಇನ್ನೆಲ್ಲ ಹಿಂದೆ ಹಿಂದೆ ಬಂದದ್ದು ಬೇರ‍ೆ ಮಾತು..