ನೀ ಮಾಯೆಯೊಳಗೋ...


--------------

ನಿನ್ನೆಗಳೆದುರು ನಿಂತು ನನ್ನ ಕಂಡೆ

ನಾನಲ್ಲವೆನಿಸಿತು

ನಾಳೆಗಳ ಒಳಹೊಕ್ಕು ಕಲ್ಪಿಸಿ ಕಂಡೆ

ನಾನಲ್ಲವೆನಿಸಿತು

ಇಂದಿನೊಳಗಿಂದಲೂ ಅದೇ ಅನಿಸಿದ್ದು..

ಹಾಗಾದರೆ ನಾ ಬಲ್ಲ ನಾನೆಲ್ಲಿ?



ಮುಂಜಾವಿನ ಭರವಸೆಯಲಿ ಆಸೆಯಾಗಿ,

ನಡುದಿನದ ಅನುಭವದಲಿ ಕಲಿಕೆಯಾಗಿ,

ಸಂಜೆಯ ಸಾಂತ್ವನದಲಿ ಶಾಂತಿಯಾಗಿ,

ಮುಳುಗೆದ್ದದ್ದೇ ಬಂತು, ಆದರಲ್ಲಿ ನಾನೆಲ್ಲಿ?



ಸತ್ಯದ ಬೆನ್ನತ್ತಿ ಸುಳ್ಳುಗಳಿಂದ,

ನಿಷ್ಠೆಯ ಬೆನ್ನತ್ತಿ ಆಮಿಷಗಳಿಂದ,

ಸಹಜತೆಯ ಬೆನ್ನತ್ತಿ ಮುಖವಾಡಗಳಿಂದ,

ಓಡಿ ಸಾಗಿದ್ದೇ ಬಂತು, ಆದರಿಲ್ಲಿ ನಾನೆಲ್ಲಿ?



ಹುಡುಕಾಟವೇ ಕಳಕೊಳುವ ಪ್ರಕ್ರಿಯೆಯಾಗಿ

ಸಿಕ್ಕು ಬಿಡಿಸುತ ಮತ್ತಷ್ಟು ಗೋಜಲಾಗಿ,

ನಿಂತನೆಲೆಯೂ ಕದ್ದದ್ದೆನಿಸಿ, ಅಯೋಮಯ ದೃಷ್ಟಿ..

ನನ್ನ ತೋರುವ ಕನ್ನಡಿಯೆ ಇಲ್ಲ, ನಿಮ್ಮನೆಂತು ಕಾಣಲಿ?