ಕ್ಷಮಿಸಿ... ನಾ ಜಾಣನಲ್ಲ....


--------------------------------

ದಡ್ಡ ಮನಸು ಕಾಣಲಿಲ್ಲ ದೊಡ್ಡ ಮಾತು,

ಕಣ್ಣಷ್ಟೇ ನೋಡಿ, ಮನ ಹಿಂಬಾಲಿಸಿತು.

ಸೊನ್ನೆಯೆಷ್ಟು, ಅಂಕಿಯೆಷ್ಟು ಲೆಕ್ಕವಿಲ್ಲ..

ಕಂಡದ್ದು ಬರೀ ಚಿತ್ರ....



ಕಾಮನಬಿಲ್ಲು ,ನವಿಲುಗರಿ ಬಣ್ಣ,

ಅಮ್ಮನ ತುರುಬಿನ ಹೂವಿನ ಬಣ್ಣ.....

ಅಪ್ಪನ ಸೈಕಲ್, ಅಜ್ಜನ ನಶ್ಯದಡಬ್ಬಿ,

ಅಜ್ಜಿಯ ಬಳೆ, ಮುತ್ತಜ್ಜಿಯ ಕುಟ್ಟಾಣಿ.....

ಬೀಜ ಗಿಡವಾಗಿ, ಮೊಟ್ಟೆ ಮರಿಯಾಗಿ,

ಮೋಡ ಮಳೆಯಾಗಿ, ಅಕ್ಕಿ ಅನ್ನವಾಗಿ.....

ತಮ್ಮನ ನಗು, ಅಕ್ಕನ ಹಾಡು,

ಅಣ್ಣನ ದುಡಿಮೆ, ಗೆಳೆಯನೆದೆಗೂಡು....

ಇಷ್ಟೇ ಇದ್ದ ಚಿತ್ರ....

ನೋಟದಂತೆ, ಹಾಡಂತೆ

ಪವಾಡದಂತೆ, ದೇವನಂತನಿಸಿತು....



ಕಾಣದ್ದು ಊಹಿಸಿ, ಕಲ್ಪಿಸಿ,

ಕದಡಿ, ಬಡಿದೆಬ್ಬಿಸುವದ್ದು

ನನಗಾಗಲಿಲ್ಲ, ಕ್ಷಮಿಸಿ ನಾ ಜಾಣನಲ್ಲ.....

ದಡ್ಡ ಮನಸು ಕಾಣಲಿಲ್ಲ ದೊಡ್ಡ ಮಾತು,

ಕಣ್ಣಷ್ಟೇ ನೋಡಿದ್ದು,

ಮನ ಹಿಂಬಾಲಿಸಿದ್ದು.....