ನಾಳೆ ಬರಲಿದೆ...


----------------------------------

ಮೊದಲಸಲ ಹೂವಂತೆ ಮುಟ್ಟಿದ್ದು,

ಮಂದಮಾರುತದಂತೆ ಸವರಿದ್ದು,

ಮೈಮರೆತದ್ದು...



ಕಣ್ಣ ಕಣ್ಣಲಿ ಮೀಯಿಸಿದ್ದು,

ರೆಪ್ಪೆಯಲಿ ತೋಯ್ದುದನೊರೆಸಿದ್ದು,

ಕನಸಲಿ ಅಲಂಕರಿಸಿದ್ದು..



ಮುತ್ತಲಿ ಮೊಗ ಮರೆ ಮಾಡಿದ್ದು,

ಮತ್ತೆ ಮತ್ತೇರಿದಂತಾಡಿದ್ದು,

ಇನ್ನೂ ಚಂದ ನಾನೆನಿಸಿದ್ದು.....



ಬೆಸುಗೆಯಿನ್ನೂ ಹಸಿಹಸಿ, ನಾ ಪ್ರೀತಿಯೆರೆದಿರುವೆ,

ಒಣಗಬಿಟ್ಟಿಲ್ಲ.......

ನೀ ಒಣಗಿಸಿರುವೆ, ಇಂದು ನಿನ್ನ ಸ್ಪರ್ಶವೇ ಹೇಳಿತು,

ಒಣಗಿ ಒರಟಾಗಿಬಿಟ್ಟಿದೆ....

ಗೊತ್ತು..... ನಾ ಮೌನವಪ್ಪಬೇಕು,

ಒಪ್ಪಬೇಕು......ಒಪ್ಪಿಸಿಕೊಳಬೇಕು...



ತಾಳಿಕೊಳ್ಳುವುದ ನಾ ಬಲ್ಲೆ, ಮನಸಲ್ಲ...

ಬಹುಶಃ ಈಗದು ಹಾಗಿಲ್ಲ, ತಲೆ ಬಾಗದು...

ಸುಮ್ಮಸುಮ್ಮನೆ ನಗದು, ನುಂಗದು...

ಜಾರಿಬಿದ್ದ ತಾರೆ ನಗು, ಶುಭಕೋ ಅಶುಭಕೋ

ಕಣ್ಣಹನಿಯಾಗಿ ಉದುರಿದ್ದಕೆ....

ನಿನ್ನ ಹಣೆಗೆರೆಯ ನಡು ಕುಳಿಯಾಗಿದೆ....



ನೀ ತಯಾರಿರು... ನಾಳೆ ಬರಲಿದೆ ....

ಒಣಗಿದ್ದ ಚಿಗುರಿಸುವುದೋ,

ಒಲೆಗಿಟ್ಟು ಚಳಿ ಕಾಯಿಸುವುದೋ...

ಈ ರಾತ್ರಿಯೇ ನಿರ್ಧರಿಸಬೇಕಿದೆ.....