**

ಕಾಡಿ ಕರೆವ ಭಾವ
ಹೊತ್ತಿರದಿದ್ದರಷ್ಟು ನೋವ
ನಿನಗೆಲ್ಲಿ ಮುಟ್ಟುವುದೋ ದೇವ?!
ನೋವು ತಲುಪುವ ವೇಗ
ಬೆಳಕಿಗಿಂತಲೂ ಹೆಚ್ಚು...
ಅದಕೇ ಇರಬೇಕು
ಒಟ್ಟಿಗೇ ನಿನ್ನಲ್ಲಿಂದ ಹೊರಟವು,
ಇದು ನೋಡು ನನ್ನ ತಾಗಿ
ಪ್ರತಿಫಲಿಸಿ ನಿನ್ನ ಮುಟ್ಟಿದ್ದಾಗಿದೆ,
ನಿನ್ನುತ್ತರವೆನ್ನ ನೇವರಿಸಿದ್ದೂ ಆಗಿದೆ...
ಅದಿನ್ನೂ ಬಹುಶಃ ದಾರಿಯಲಿದೆ...
-------------------------------

ದಯವಿಟ್ಟು ಮರೆಯದಿರು..
ಕಹಿಯಲೊಮ್ಮೆ
ಸಿಹಿಯಲೊಮ್ಮೆ
ಬಾರಿಬಾರಿ ಅದ್ದಿ
ನಿನ್ನ ರಚನೆ ಮಾಡಿದವನೇ
ನನ್ನದೂ ಮಾಡಿದ್ದು....
------------------------
ಕಣ್ಣು ಸಾಗರ ತುಂಬಿಕೊಳುತಿತ್ತು,
"ಅಬ್ಬಾ ಸುಂದರ.." ಮನ ಗುನುಗುತಿತ್ತು.
ಕಣ್ಣು ಸೋಲುವ ದೂರದಲೆಲ್ಲೋ ಮಿಣುಮಿಣುಕೆನುತಿತ್ತು,
ಬಳಿಬಂದ ಹಡಗು ತುಂಬಿ ದೃಷ್ಟಿ ಮೀರಿ ಹಬ್ಬುವಷ್ಟಿತ್ತು.
ಅದೆಷ್ಟೋ ಬಾರಿ ಕೇಳಿದ್ದರೂ ದೂರದ ಬೆಟ್ಟದ ಗಾದೆ
ನೂರೊಂದನೆಯ ಬಾರಿ ಸಾಪೇಕ್ಷತೆ ಬೆರಗು ಹುಟ್ಟಿಸಿದೆ.