ಮಾತು ಮೌನವೆರಡೂ ತಲುಪಿಸುತಿದ್ದುದು ನಿನ್ನನೇ.
ಒಮ್ಮೆ ಗಟ್ಟಿಕಟ್ಟೋಣವಾಗಿ ಒಮ್ಮೊಮ್ಮೆ ಒಂಟಿಹಗ್ಗಸೇತು.
ಸರಾಗ ಓಡೋಡಿ ಬರುತಿದ್ದೆ ಬಿಟ್ಟು ಹಗುರ-ಭಾರದ ಪರಿವೆ.
ಒಮ್ಮೆ ಬಹಳಷ್ಟು ಉಟ್ಟು, ಒಮ್ಮೊಮ್ಮೆ ಎಲ್ಲ ಕಳಚಿಟ್ಟು.

ಮಾತಲಿ ಶಬ್ದಾರ್ಥಗಳು ಉಮೆ-ಪರಶಿವರಾಗುತಾ
ನಾವು ಬಾರಿಬಾರಿ ನಾವಾದೆವು ಒಳಗಿಣುಕುತಾ.
ಒಮ್ಮೆ ಹೆದರಿ, ಒಮ್ಮೊಮ್ಮೆ ಗರಿಗೆದರಿ.
ಒಮ್ಮೆ ಒಕ್ಕಣ್ಣಲಿ, ಒಮ್ಮೊಮ್ಮೆ ಮೈಯ್ಯೆಲ್ಲ ಕಣ್ಣಾಗಿ.

ಮೌನದಲಿ ಮೂರ್ತಾಮೂರ್ತವು ಎದೆಗುಡಿ ಹೊಗುತಾ
ಅರಿವಿನ ಹೊಸಿಲಾಚೆ ಕಣ್ಣಾಚಿನ ಚಿತ್ರವಾದೆವು ಭಾಸವಾಗುತಾ.
ಒಮ್ಮೆ ಕಣ್ದೆರೆದು ಒಮ್ಮೊಮ್ಮೆ ಮೈಮರೆತು.
ಒಮ್ಮೆ ನಂಬಿ ತಲೆಬಾಗಿ ಒಮ್ಮೊಮ್ಮೆ ತಲೆದೂಗಿ.

ಹೊತ್ತು ಸವೆಸುವುದೇನೋ ಎಲ್ಲವನೂ!
ಶಿಥಿಲವಾದಂತೆ ಇಂದು ಮಾತು ಮೌನವೆರಡೂ
ಸುಳ್ಳೆನಿಸಿ ಒಮ್ಮೆ ನೀರ್ಗುಳ್ಳೆಯೆನಿಸಿ ಒಮ್ಮೊಮ್ಮೆ
ಹೆಜ್ಜೆ ನಿಂತ ಹಾಗೊಮ್ಮೆ ಹೂತುಹೋದ ಹಾಗೊಮ್ಮೆ.