ಸುಳ್ಳುಗಳ ಶರಶಯ್ಯೆ!
ನಂಬಿಕೆಗೆ ಇಚ್ಛಾಮರಣವೊಂದು ವರವಿರಲಿಕ್ಕಿಲ್ಲ.
ಸಾವನಪ್ಪಲಾಗದೆ ಉಳಿವಿಗಾಸ್ಥೆಯಿಲ್ಲದೆ
ಮಿಣುಮಿಣುಕೆನುತಿದೆ ಜೀವಭಾವ!

ತೋಡಿದ ಗೋರಿ ಆ ತುದಿಗೆ,
ಪ್ರಯೋಗಪಶು ಪ್ರೇಮ ಈ ತುದಿಗೆ.
ನಡುವೊಂದಿಷ್ಟೇ ಇಷ್ಟು ಹಾದಿ,
ನಿಂತಿವೆ ಜೋಡಿ ಹೆಜ್ಜೆ ಬಲು ಹುಮ್ಮಸ್ಸಲಿ.
ನಗೆಯು ಬರುತಿದೇ ಎನಗೆ...

ನಗುವಿಗೋ ಅಳುವಿಗೋ
ಕಣ್ಣಂತೂ ತುಂಬಿದ್ದಾಗಿದೆ.
ಆಗಸದಂಥ ಬದುಕಿನಗಲ
ಎಲ್ಲ ಗಾಂಭೀರ್ಯ
ಎಲ್ಲ ಸೌಂದರ್ಯ
ಕಿತ್ತುಕೊಂಡು
ಆಸೆಬಳ್ಳಿ ಪೊಗದಸ್ತು ಹಬ್ಬಿಸಿಟ್ಟು
ಬಣ್ಣಬಣ್ಣದ ಸುಳ್ಳರಳಿಸಿ
ಮೇಲಷ್ಟು ಮೋಸದ ಘಮವೆರಚಿಬಿಟ್ಟು
ಬೊಗಸೆದುಂಬಿದ ಒಲವೇ,
ನೀನಂದರೆ ನಂಬಿಕೆಯಲ್ಲವೇ?
ಹೌದು ನಿನಗದು ಶಾಪವೇ..
ಬಯಸಿದಾಗಲಷ್ಟೇ ಬರುವ ಸಾವು!
ಬದುಕುವಾಸೆಯ ಜೊತೆಗೆ ನೋವು!