(ಚಿಲಕ- ಮುಳ್ಳು - ಅಜರಾಮರ- ಪೊರೆ)

ಎದೆತೋಟಕೆ ಬೇಲಿಬಾಗಿಲಿಲ್ಲ ಅನುವರಿದ್ದಾರು,
ನಾನೊಬ್ಬಳಿದ್ದೇನೆ ಚಿಲಕ ಕಂಡಿಲ್ಲದ ಕದ-ಕಿಂಡಿಗಳೊಡತಿ!
ಹೂದೋಟಕೆ ಬರುವುದಾದರೆ, ಹೂವಂಥ ನಗೆಯೇ ಬರಬೇಕು.
ಮುಳ್ಳ ನೆನೆಯುತಾ ಭಯ ಬಂದಾಗ ನಡುಗುವ ಕೈಗೆ ಮುಳ್ಳೇ ತಾಕೀತು..
ನಿನ್ನೆ ರಾತ್ರಿ ಹಾವು ಬಂದಿರಬೇಕು; ಹಿತ್ತಲಲಿ ಕಳಚಿದ ಪೊರೆ!
ನಮ್ಮದಾಗಿಸಿಕೊಂಡ ಕುರುಹಷ್ಟೇ ಅಜರಾಮರ;
ಗಳಿಸಿ, ಉಳಿಸಿ, ಉಂಡುಟ್ಟು ಹಾಸಿಹೊದ್ದದ್ದೆಲ್ಲವೂ ನಶ್ವರ!
ಸುಮ್ಮನೇ ಹೇಗೆಹೇಗೋ ಹೆಸರುಳಿಸಿಹೋದೇನಬೇಡ ಮನಸೇ,
ಋಣವುಳಿಸಿಹೋಗು ಜನ್ಮಗಳಿಗಾಗುವಷ್ಟು; ಮತ್ತೆ ಮತ್ತವರೇ ಎಲ್ಲ ಸಿಕ್ಕಿಯಾರು.