ಅದೆಷ್ಟೋ ಚಂದದ ನಿನ್ನೆಯೊಂದು
ಕ್ಷಣಮಾತ್ರದಲಿ ಎಲ್ಲ ಹೊತ್ತೊಯ್ದು
ಬೋಳುಬೋಳಾಗಿಸಿದ
ಅಷ್ಟೊಂದು ಚಂದವಲ್ಲದ
ಮೆಲ್ಲ ಮಾತಾಡುವ ಇಂದಿನ
ಕತೆ ಹೇಳುತಿರುವ ಮಿಶ್ರವರ್ಣದ ಸಂಜೆಯಲಿ
ಒಂದಷ್ಟು ಸಾಮಾನು ಹೊತ್ತುತಂದೆ

.


ಬೆನ್ನುಗಳಿಗೇ ಅಂಟುತ
ಸದಾ ಕಸವೆಂದು ಸುಳ್ಳಾಡುವ
ಕಣ್ರೆಪ್ಪೆಗೊಂದು ಅಪೂರ್ವ ನಿದ್ದೆಯಂಟಿಸುವ ಗೋಂದು..
ಬಿಟ್ಟುತೆರಳುವ ಗಳಿಗೆಯನಷ್ಟೇ ಹಾಡುವ ಕಂಠಕೆ
ಏಕಾಂತನಾದದ ರುಚಿ ಹತ್ತಿಸುವ
ಒಳಯಾನ ರಾಗದ ಆರೋಹ ಅವರೋಹ...
ನೀನು ಮತ್ತು ನಿನ್ನೆಯೊಡಲಿಂದ ನಿಷ್ಫಲ ಕ್ಷಣ ಹೆಕ್ಕಿ
ಮಾರ್ಗನಕಾಶೆ ಬರೆವ ಭಾವಕೆ,
ಅನುಸರಿಸುವ ಕಾಲಿಗೆ
ನಿಂತಲ್ಲೇ ನಿಲಿಸುವ ಸರಪಳಿ..
ಅಲ್ಲೆಲ್ಲೋ ವರ್ಷದ ಸೂಚನೆಗೇ
ನಂಬಿ ನವಿಲಾಗುವ ಹೆಜ್ಜೆಗೊಂದು
 ಮಳೆಹನಿ ಪೋಣಿಸಿದ ಗೆಜ್ಜೆ..

ಹೋ... ಸಾಕಷ್ಟಾಯಿತು!
ಒಳಗೆ ನಗೆಯ ಉದ್ಯಾನಕೆ ಬಿತ್ತಿದ್ದೇನೆ.
ನಿನಗಿದೋ ಸ್ವಾಗತ ಒಲವೇ,
ಕಣ್ಣಿಂದ ನೇರ ಬೇರಿಗೇ ಹಾದಿಯೂ ಆಗಿದೆ.
ಇನ್ನೊಂದೊಂದು ಹನಿಯೂ
ಹೂವರಳಿಸುವ ಹೊತ್ತು ದೂರವಿಲ್ಲ.