ನೀನ್ಯಾತಕಾದೆಯೋ

-----------------
ಬತ್ತದ ಬಾವಿಯೊರತೆ ಅಲ್ಲಿದೆ,
ಮಗೆದಷ್ಟೂ ಒಸರುವುದು.

ಕುಡಿದರೂ, ಚೆಲ್ಲಿದರೂ
ನೀರೇ ಅದು, ಆಗದು ಬೇರೇನೂ.

ಬಣ್ಣವಿಲ್ಲದೆ ಪಾರದರ್ಶಕ,
ಆಕಾರವಿಲ್ಲದ ನಿರಹಂಕಾರ.

ಕಲಕದೇ ನಿಟ್ಟಿಸು,
ನಿನ್ನ ನೋಡಬಹುದು,

ಕಲಕಿ ನಿಟ್ಟಿಸಿದರೆ,
ಬಿಂಬ ನಿನದೇ ಮುರಿವುದು.

ಕ್ಷಣಕಾಲ ಕುಲುಕಾಡಿ
ಮತ್ತದು ಶಾಂತ,

ಕಲಕದಿರುವ ತನಕ
ನೀನೇ ವಿಭ್ರಾಂತ.

ಮೆಳ್ಳೆಗಣ್ಣು ಮೊಂಡುಮೂಗು
ಕಂಡರದು ನಿನದೇ, ಅದರದಲ್ಲ...

ಪರೀಕ್ಷೆಗದು ಸರ್ವಸನ್ನದ್ಧ
ಗಟ್ಟಿ ಅಸ್ತಿತ್ವ, ಬಲು ಪರಿಶುದ್ಧ.

ಕೆಸರೆಲ್ಲೆಡೆ ಇದೆ,
ನಿನ್ನಲೂ, ಅದರಲೂ.

ನಿನದೆಲ್ಲಿದೆಯೋ ಗೊತ್ತಿಲ್ಲ,
ಅದರದು ತಳಸೇರಿ ಮೌನ..

ಎದ್ದರೂ ಅಲ್ಲೊಮ್ಮೊಮ್ಮೆ
ಅದು ಅಡಿಗೇ ತಳ್ಳುವುದು.

ನಿನದು ಹಾಗಲ್ಲ, ನಿನನೇ
ಕರಗಿಸಿ ಮರೆಸುವುದು..

ನೀ ಕುಡಿದು ಸವಿಯೆನಲಷ್ಟೇ
ಅದು ಧನ್ಯವಲ್ಲ,

ಮೊಳೆಸುವುದು, ಬೆಳೆಸುವುದು

ತೊಳೆದು ಬೆಳಗಿಸುವುದು

ಜೀವಚೈತನ್ಯವದೆಂದು,
ಅವನಾರಿಸಿದ ಧನ್ಯತೆಯಿಹುದಲ್ಲಾ...
ತನ್ನಿರುವೇ ಅದಕೆ ಪ್ರೋತ್ಸಾಹ
ಎಲ್ಲ ಕಾಲಕು ಒಂದೇ ತರದುತ್ಸಾಹ

ಕೇಳದು ಗುರುತು-ಸಮ್ಮಾನ,
ಬತ್ತದುಳಿವುದದರ ಬಹುಮಾನ.

ವ್ಯರ್ಥ ಶೋಧಿಸದಿರು,
ಮಲಿನವಲ್ಲಿಲ್ಲ,

ನೀನ್ಯಾತಕಾದೆಯೋ,
ಎಲ್ಲೂ ಒದಗಿಲ್ಲ