ಎದೆಯಿಂದಾಲಿಸು


------------------------

ತರಗೆಲೆಯುದುರುವ ಮೌನದಿ

ಚಿಗುರೆಲೆ ಹುಟ್ಟೋ ಪಿಸುಮಾತು.

ಮೊಗ್ಗರಳುವ ಮೌನದಿ

ದುಂಬಿಗಾಹ್ವಾನದ ಹಾಡು.

ಹೂವುದುರುವ ಮೌನದಿ

ಅಳುವ ತೊಟ್ಟ ಬಿಕ್ಕಳಿಕೆ.

ಮಂದಮಾರುತದ ಮೌನದಿ

ಗಂಧತೇರ ಯಾನಗಾನ.

ಬೆಟ್ಟ ಉಟ್ಟ ಗಾಢ ಮೌನದಿ

ದೇಗುಲದ ಗಂಟೆಯ ಮಾರ್ದನಿ.

ಗರ್ಭಗುಡಿಯ ದೈವೀಮೌನದಿ

ಭಕ್ತನ ಸವೆದ ಚಪ್ಪಲಿಯ ಸದ್ದು.

ಮನೆಯಂಗಳದ ಶಾಂತಮೌನದಿ

ಹೆಣ್ಮನದ ಕಣ್ಣೀರ ಭೋರ್ಗರೆತ.

ಆಗಸದ ಚಂದ್ರತಾರೆಯ ಮೌನದಿ

ಕತ್ತಲ ಅಸ್ಪಷ್ಟತೆಯಟ್ಟಹಾಸ.

ಕೆಡುಕು ಘಟಿಸದ ಇಂದಿನ ಮೌನದಿ

ನಾಳಿನ ಸಾಲುಸ್ಫೋಟಕದ ಗುಟ್ಟು.

ಪ್ರಕೃತಿಯ ನಗೆಯ ಮೌನದಿ

ಅಳಿವು ಮೊಳೆಯುತಿಹ ಡಂಗುರ.



ನನ್ನ ಮೌನದಲೂ ನಾನಿಲ್ಲ, ನೀನಿಲ್ಲ,

ನಿನ್ನೆನಾಳೆಗಳಿಲ್ಲ.

ಕೇಳಬಲ್ಲೆಯಾದರೆ ಕಿವಿಯಲ್ಲ,

ಎದೆಯಿಂದಾಲಿಸು...ಕಲ್ಪಿಸದಿರು,

ಮೌನವೂ ಇಲ್ಲಿ ಮೌನವಲ್ಲ....

ಹುಟ್ಟಿದ್ದರೂ, ಉಸಿರಿದ್ದರೂ, ಸಾವಿದ್ದರೂ

ಅದನನುವಾದಿಸು,

ನಿಜವನನುಮೋದಿಸು.