ಓದಬನ್ನಿ


---------------

ಶರಧಿಯಲೆ ಮೇಲೊಂದು ಹಾಳೆ,

ಒದ್ದೆ, ಆದರೆ ಮುದ್ದೆಯಾಗಿಲ್ಲ.

ಉಳಿಯಲಾರದೆಡೆ ತೇಲುತ

ತಾನಾಗುಳಿದು ಸಾಗಿದೆ



ಉಬ್ಬರದಬ್ಬರ, ಮೆಲ್ಲ ಬಳುಕುವಿಕೆಗೆ

ಹಗಲ ಗಾಂಭೀರ್ಯ, ಇರುಳ ಮೌನಕೆ,

ಜನಜಾತ್ರೆಗೆ, ಏಕಾಂತಕೆ

ರವಿಕಿರಣದ ಬಿಸಿ, ತಿಂಗಳನ ತಂಪಿಗೆ,

ಚಂದ್ರಿಕೆಯ ಹಾಲುಡುಗೆ, ಅದಿಲ್ಲದ ಕಪ್ಪಿಗೆ.

ಹೀಗೆ ಲಕ್ಷ ಅಕ್ಷರ ಇಳಿಸಿಕೊಂಡಿದೆ.



ದಡ ಮುಟ್ಟುವ ಅಲೆಯ ತವಕಕೆ,

ಜೊತೆಬಂದ ಕರಟದ ಖಾಲಿತನಕೆ,

ಧಾವಿಸುವ ವೇಗಕೆ, ಉದ್ವೇಗಕೆ,

ಮತ್ತೆ ಮುಟ್ಟಿದ ಕ್ಷಣ ಭ್ರಮನಿರಸನಕೆ,

ತಗ್ಗಿದ ವೇಗ, ನೀರಗುಳ್ಳೆಯ ಹುಟ್ಟಿಗೆ

ಸಾಕ್ಷಿಯಾಗಿ ಪ್ರತಿ ಏರಿಳಿತಕೆ.





ಓದಬನ್ನಿ ಅಕ್ಕರವೊಂದೂ ಅಳಿಸಿಲ್ಲ

ವಿದ್ಯೆಯಲ್ಲ, ಚರಿತ್ರೆಯಲ್ಲ,

ಕತೆಯಲ್ಲ, ಗೀತೆಯಲ್ಲ.

ಬರಹ ಹಾಳೆಯ, ಅಲೆಯ ಬದುಕು..

ಸಾರಿ ನೀಡಿದ್ದು ಸಂದೇಶವಲ್ಲ,

ತಾನಾಗುಳಿವ ಸತ್ವದಮೃತದ ಗುಟುಕು.