Thursday, January 17, 2013

ಅಸ್ಪಷ್ಟ ಗಳಿಗೆ


----------------------

ಬಹುಶಃ ಒಳಗಿಹುದೊಂದು ಕೂಸು

ದೇಹಕಷ್ಟೆ ವಯಸು,

ಮಾಗಿಲ್ಲ ಮನಸು.

ಇದು ತೂಕವೆನಿಸಿದ್ದು,

ಅನುಭವದ ತೆಕ್ಕೆಗೆ ಹಗುರ.

ನನದಲ್ಲದ ನನಗಿಲ್ಲದ

ಅನುಭವವ ಎಲ್ಲಿಂದ ತರಲಿ?!

ಇದು ಮಹಾ ಎನಿಸಿದ್ದು

ಪಕ್ವತೆಯ ಮಾತಲಿ ಗೌಣ

ನನದಲ್ಲದ ನನಗಿಲ್ಲದ

ಪಕ್ವತೆಯ ಎಲ್ಲಿಂದ ತರಲಿ?!

ನಾ ಏತಿ ಅಂದದ್ದು

ಅನುಭವಕೆ ಪ್ರೇತಿ

ನಾನೋಡೊ ಎತ್ತಂತೆ,

ಪಕ್ವತೆ ನೀರಿಗೆಳೆದಂತೆ.

ನಿಂತೆಡೆಯೆಲ್ಲಿ, ಗುರಿಯೆಲ್ಲಿ?

ನೆಲೆಯೆಲ್ಲಿ, ಆಧರಿಸೊ ನೆಲವೆಲ್ಲಿ?

ಅರಿವ ದಾರಿಯಲಿರುವ ಭ್ರಮೆ,

ಭ್ರಮೆಯೂ ಅದಲ್ಲದ ಅಪಾಯ.

ನೆರೆದ ಜಾತ್ರೆಯ ಸದ್ದಲಿ

ಮೌನ ಮುಸುಕಲಿ ನಿಧಿಯೊಂದು

ಕರೆಯುತಿದೆ-"ಬಾ ಇಲ್ಲಿ ಒಳಗೆ "

ಕೂಗುತಿದೆ-"ಸದ್ದು.. ಯಾರದು ಹೊರಗೆ"

ಬಾಯ್ಮುಚ್ಚಿ ಒಳಹೊಕ್ಕಲೇ,

ಕಣ್ಮುಚ್ಚಿ ನಿಂತುಬಿಡಲೇ,

ಕಿವಿಮುಚ್ಚಿ ಮುನ್ನಡೆಯಲೇ??

ಅಸ್ಪಷ್ಟಗಳಿಗೆ...ಹಿತವೋ-ಅಹಿತವೋ

ಮೈಮನ ಜಡ್ಡಾದಂತೆ,

ಚಿವುಟಿದ್ದೂ, ಹಿಂಡಿದ್ದೂ

ಮೆಲುಸ್ಪರ್ಶದಂತೆ.

ನವಿರುಗರಿ ತಾಕಿದ್ದು

ರಕ್ತ ಜಿನುಗಿಸಿದಂತೆ.



No comments:

Post a Comment