ಸಂತೆ


-----------------

ಸಂತೆ ನೆರೆದಿದೆ ಜಗದಗಲ,

ಅಲ್ಲಿದ್ದಿಲ್ಲಿದ್ದಲ್ಲ, ಅದಕೆಲ್ಲೆಯಿಲ್ಲ.

ಬೆಲೆ, ವೇಳೆ ನಿರ್ದಿಷ್ಟವಲ್ಲ,

ತೆರೆದಾಗಿದೆ, ಮುಚ್ಚ್ಚುವುದಿಲ್ಲ.



ಹೆಸರಿದೆ, ಅನುಭವಸಂತೆ....

ಹೊರಗಿದ್ದಲ್ಲದೆ ಒಳಗಣ್ಣಿಗೂ ಸಲುವ

ರಾಶಿರಾಶಿ ಸರಕಿದೆ,

ಎಲ್ಲೋ ಒಮ್ಮೊಮ್ಮೆ ಆಯ್ಕೆಯೂ ಇದೆ.



ಸತ್ಯ, ನಿಷ್ಠೆ, ಪ್ರೀತಿ, ಸೌಜನ್ಯ

ತುಂಬಿರುವ ಪುಟ್ಟ ಚೀಲಗಳು.

ಸುಳ್ಳು, ನೋವು, ದೌರ್ಜನ್ಯ

ತುಳುಕುವ ಭಾರೀ ಮೂಟೆಗಳು.



ನಗು, ಚೆಲುವು-ಒಲವು ಗ್ರಾಮ್ ಲೆಕ್ಕದಲ್ಲಿ,

ಅಸಮಾನತೆ, ಅಸಹಾಯಕತೆ ಕೆಜಿಗಟ್ಟಲೆ.

ಹಣದ ಝಣಝಣವಿಲ್ಲ, ಚಿಲ್ಲರೆಯ ಗೋಜಿಲ್ಲ,

ಅಲ್ಲಿ ಕೊಂಡದ್ದಿಲ್ಲಿ, ಇಲ್ಲಿದ್ದಲ್ಲಿ ವ್ಯಾಪಾರ.



ಹೊರಗೊಬ್ಬ ಕೂತಾತ ಧಣಿಯಿದಕಂತೆ.

ಹೊಕ್ಕ ಹೆಜ್ಜೆಹೆಜ್ಜೆಗು ಬಾಡಿಗೆಯಿದೆಯಂತೆ.

ಹಾದವಗೆ ಪ್ರವೇಶ ಅನಿವಾರ್ಯವಂತೆ,

ನಿಂತುಸಿರಿಗೇ ಹೊರದಾರಿ ತೆರೆವುದಂತೆ.



ಚಕ್ರವ್ಯೂಹವಂತೆ, ಬಿಡುಗಡೆ ದೂರವಂತೆ.

ಕಣ್ಣೀರು, ಕಣ್ಣು ಮಂಜಾಗಿ ದಾರಿತಪ್ಪುವುದಂತೆ.

ಕಂಗೆಡಿಸೆ ಭಾರ, ಸೋಲು ಖಚಿತವಂತೆ.

ನಗುವಿನಾಧಾರವೇ ಹಗುರಾಗಿಸುವುದಂತೆ.