ಆಕಾಶ, ಕಡಲು ಮತ್ತು ನಾನು

ಆಕಾಶ ನೋಡು..
ಸೂರ್ಯ ಚಂದ್ರ ತಾರೆ
ಮಿಂಚು ಮೋಡ ಮಳೆಬಿಲ್ಲು ಹೀಗೇ
ಎಷ್ಟೆಲ್ಲ ತನದೇ ಆಗಿದ್ದರೂ
ಒಮ್ಮೊಮ್ಮೆ ಅವಿರಲೇ ಇಲ್ಲವೆಂಬಂತೆ
ಬರೀ ನೀಲಿ ಖಾಲಿಖಾಲಿ.

ಸಾಗರ ನೋಡು..
ಮುತ್ತು ರತ್ನ ಉಪ್ಪು
ಮೀನು ಮೊಸಳೆ ಹಾವು ಹೀಗೇ
ಎಷ್ಟೆಲ್ಲ ತನ್ನಾಸ್ತಿಯಿದ್ದರೂ
ಓಡಿ ಬರುವುದು ಮರಳೇ ಮಿಗಿಲೆಂಬಂತೆ
ದಡದ ಸ್ಪರ್ಶ ಬೇಡಿ.

ನಾನು ನೋಡು..
ನೀನು, ಅವಳು, ಅವನು
ಬಯಸಿ ಪಡೆದ, ಬಯಸದೊದಗಿದ ಹೀಗೇ
ಎಷ್ಟೆಲ್ಲ ಸಂಬಂಧಗಳಿದ್ದರೂ
ಒಟ್ಟಾರೆ ಅದೆಲ್ಲ ಭ್ರಮೆಯೆಂಬಂತೆ
ಒಮ್ಮೊಮ್ಮೆ ಆ ಆಕಾಶ, ಒಮ್ಮೊಮ್ಮೆ ಆ ಕಡಲು.