ನಿನ್ನಿಂದ ನಿನಗೆ.....

ತಿರುಚಿದ ಅಕ್ಷರಗಳನ್ನು ನೀ ಕಳಿಸಿದೆ,
ನಾ ಹಾಡುವವಳು, ರಾಗ ಸಂಯೋಜಿಸಿದೆ.
ಹಾಳೆಯಿಂದೆದೆಗೆ ಇಳಿದವುಗಳು
ಪ್ರೇಮದಲದ್ದಿ ರಾಗರಂಜಿತವಾಗಿ
ಕೋಗಿಲೆ ಕಂಠಕಷ್ಟು,
ದುಂಬಿ ರೆಕ್ಕೆಬಡಿತಕಷ್ಟು,
ತೊರೆಯ ಹರಿವಿಗಷ್ಟು,
ಮಲಯಮಾರುತಕಷ್ಟು,
ಕಂದನ ಕಾಲ್ಗೆಜ್ಜೆಗಷ್ಟು,
ಕರುಕೊರಳ ಗಂಟೆಗಷ್ಟು..
ಇಳಿದವು ಮತ್ತು ನೇರ
ಜಗದ ಮೂಲೆಮೂಲೆ ತಲುಪಿದವು
ಆ ಜಗದಲೇ ನೀನಿರುವುದಾದರೆ,
ನಿನ್ನನೂ ನೇರ ತಲುಪಿರಬಹುದು..
ಅಚ್ಚರಿಯೇನಿಲ್ಲ ಬಿಡು...
ಅವು ತಲುಪಲಾರದ ಸ್ಥಳವಿಲ್ಲ,
ಯಾಕೆಂದರೆ,
ಮೂಡಿಸಿದ್ದು ನೀನು, ಹಾಡಿದ್ದು ನಾನು....