Wednesday, June 5, 2013

ಅದೇ ಸಂಜೆ


ಸಂಜೆಯಿದು ಅದಷ್ಟೇ ಅಲ್ಲ,
ನಾಳಿನೆಲ್ಲ ಕನಸುಗಳ ಮುನ್ನುಡಿ
ಅದು ನನಸಾಗದುಳಿವ ನಿರಾಸೆಯ ಕನ್ನಡಿಯೂ..

ಸಂಜೆಯಿದು ಅದಷ್ಟೇ ಅಲ್ಲ
ಮರೆವಿನಾಶ್ರಯ ನಿದ್ದೆಗೆ ರಹದಾರಿ
ನೆನಪೇ ಕಾಡುವ ಕಾರಿರುಳ ರಾಯಭಾರಿಯೂ..

ಸಂಜೆಯಿದು ಅದಷ್ಟೇ ಅಲ್ಲ
ಇಂದಿನ ಸೋಲು ನಾಳೆ ಗೆಲುವಾಸೆಯಂಜನ
ನಾಳೆ ಮತ್ತೊಂದು ಇಂದೇ ಆಗುವ ಸತ್ಯದರ್ಶನವೂ..

ಸಂಜೆಯಿದು ಅದಷ್ಟೇ ಅಲ್ಲ
ತಾರೆತಾರಿಣಿಯರಿಗೆ ಸ್ವಾಗತ ಗೀತೆಯಾಲಾಪ
ರಸದಭಾವದಲಿ ಕ್ಷತಮನಕದೊಂದು ಪ್ರಲಾಪವೂ..

ಸಂಜೆಯಿದು ಅದಷ್ಟೇ ಅಲ್ಲ
ದಿನದ ದಣಿವಿಗೆ ವಿರಾಮದ ಸಾಂತ್ವನದ ಲೇಪ
ಬೆಳಕು ಗತಿಸುವಾಗ ಕುರುಡು ಕಣ್ಣಿಗೆಲ್ಲ ಮುಗಿದ ತಾಪವೂ..






No comments:

Post a Comment