Saturday, June 8, 2013

ಕೈಯೇನೋ ತುಂಬಿತು

ಇಲ್ಲೇ ಎಲ್ಲೋ ಅಂದೊಮ್ಮೆ
ಬಿದ್ದಿತ್ತೊಂದು ತುಣುಕು
ಮೆತ್ತಿ ಕೆಸರು ಅಂಕುಡೊಂಕು
ಕೈಗೆತ್ತಿಕೊಂಡೆ, ಕಾಲೊಸು.

ಹಾರುಹಾರುತ್ತ ಹಕ್ಕಿಯುದುರಿಸಿದ
ರೆಕ್ಕೆಪುಕ್ಕ, ಕೈಗೆತ್ತಿಕೊಂಡೆ..

ಪೊರಕೆಯುದುರಿಸಿದ ಅರ್ಧಂಬರ್ಧ
ಚೂಪಿರದ ಕಡ್ಡಿ, ಕೈಗೆತ್ತಿಕೊಂಡೆ...


ಮಾಂಸಲ ತಿರುಳು ತಿಂದುಗುಳಿದ
ಗಟ್ಟಿ ಮಾವಿನಗೊರಟು, ಕೈಗೆತ್ತಿಕೊಂಡೆ..

ಆಟಿಕೆಯ ಒಳಗಿಟ್ಟು ರಕ್ಷಿಸಿದ ಖಾಲಿ
ಚಿತ್ರದ ರಟ್ಟಿನ ಡಬ್ಬ, ಕೈಗೆತ್ತಿಕೊಂಡೆ...

ಮತ್ತೇರುವಂತೆ ಕುಡಿದು ರಿಕ್ತವಾಗಿಸಿದ
ಅವಳಾಕಾರದ ಕುಪ್ಪಿ, ಕೈಗೆತ್ತಿಕೊಂಡೆ...

ಮೆತ್ತನೆ ಕಾಲ ತೊಡರಿತು ಹೂವೊಂದು
ಎರಡೂ ಕೈ ಚಾಚಿದೆ
ಕೈ ತುಂಬಿ ಹೋಗಿತ್ತು
ಬೋಳು ತುರುಬು ಅಣಕಿಸಿತು.






1 comment:

  1. ಹೂರಣದಲ್ಲಿ ವಿಭಿನ್ನತೆ ಮೊದಲು ಮನಸೆಳೆಯಿತು. ಒಳ್ಳೆಯ ರಚನೆ.

    ReplyDelete