Thursday, June 6, 2013

ಎಲ್ಲವೂ ಅಷ್ಟೇ..

ಬರೆದುದೂ ಅಷ್ಟೆ, ನುಡಿದುದೂ ಅಷ್ಟೆ
ತುಂಡುಖಂಡಗಳ ತೇಪೆ
ಅಪೂರ್ಣ ಕೃತಿ, ಪೂರ್ಣಕೃತಿಯೆಂಬುದೆಲ್ಲಿದೆ?!

ತೊರೆದುದೂ ಅಷ್ಟೆ, ಜರೆದುದೂ ಅಷ್ಟೆ
ಹೌದು ಅಲ್ಲಗಳು ನೇಯ್ದ ಚಾಪೆ
ಅರೆನಿದ್ರೆ, ಅರೆಜಾಗೃತಿ, ಶುದ್ಧನಿದ್ದೆಯೆಲ್ಲಿದೆ?!

ಸತ್ಯವೂ ಅಷ್ಟೆ, ಸುಳ್ಳೂ ಅಷ್ಟೆ
ನಿತ್ಯಾನಿತ್ಯತೆ ಪೋಣಿಸಿದ ದಾರ
ಕೊಂಡಿಗಂಟಿಲ್ಲ, ಇಡೀ ಸರವಾದೀತೆ?!

ಪಡೆದುದೂ ಅಷ್ಟೆ, ಕಳೆದುದೂ ಅಷ್ಟೆ
ಬೇಕು ಬೇಡಗಳ ಕಣ್ಣಾಮುಚ್ಚಾಲೆ
ಅರೆಗಣ್ಣಷ್ಟೇ ತೆರೆದ ಪಾಡು, ಅಖಂಡ ಅರಿವೆಲ್ಲಿದೆ?!

ನಾನೂ ಅಷ್ಟೇ, ನೀನೂ ಅಷ್ಟೇ
ಇಂದು ನಿನ್ನೆಯ ಆಗುಹೋಗಿನ ಮೊತ್ತ
ತೋರಿ ಮಡಚಿದ ಬೆಟ್ಟು ನೋಡು, ಸಮರ್ಪಣೆಯೆಂಬುದೆಲ್ಲಿದೆ?!

No comments:

Post a Comment